在銅鑼灣鬧市，有時想搵個地方靜靜地坐下，都真係唔易！有cafe就推出$50任飲，又設書籍任君翻閱。在節奏緊湊的大都會，不妨就花$50，以悠閒心情沾染久遺了的文化氣息。

撰文、攝影：成慧詩

環保藏書閣

　　甫踏進THINK cafe，視線已被左手邊的一排排書櫃吸引。在銅鑼灣鬧市，有時想搵個地方靜靜地坐下，都可以話係一件難事。設於京都廣場19樓嘅呢間Cafe，裝修布置以簡潔為主。白色牆身，配暖色家具梳化，加入玻璃窗邊引入的自然光，氣氛寧謐又cozy。多達幾百本的書籍，種類由歷史文化、流行小說、理財、去到雜誌等等都有，最啱一眾書蟲，店主Otto謂店內的某份書為自己的愛藏，有一些是身邊朋友的讀物，欲與大家分享。遊戲方面選擇不多，店主解釋道，THINK的理念是希望打造一個文化交流，且同時可以認識新朋友的地方，閒時亦舉辦不同活動，如講座及月底的手作flea market等，且歡迎包場。

任飲即磨咖啡

　　THINK cafe自開業以來，以$50任飲作招徠！基本上，$50已經是平時去Cafe點一杯飲品既消費，加上香港地，依家買咩都愈黎愈貴既時勢，想$50花得值，有時候都要諗諗計！$50任飲，又有書睇，聽落的確殺食，最重要係選擇及質素都一樣keep到水準，絕不將貨就價。飲品選擇亦不下十多款，有冷有熱，咖啡或茶，汽水及樽裝飲品一樣有齊。咖啡系列全部即磨豆即沖，除了大路選如cappuccino、latte、mocha、espresso外，想花巧少少？另有玫瑰、楱子、薄荷、焦糖、愛爾蘭咖啡！花茶系列包括粉紅玫瑰、檸檬草、薄荷葉、桂花。

自家心機甜點

　　於舒舒服服的環境之下睇書，閒閒地都可以坐上半日，不過淨飲的話，肚餓又點算呢？好彩cafe供應即叫即製的飛碟，都醫得下肚咖！另外見凍櫃擺放幾款精緻cake，細問店主Otto之下，原來全屬友人的自家製品，放在店中寄賣，款式亦會定期更新。今次上去就有Chocolate concorde、Lemon pie、MarbleCheesecake、芒果布甸等等，水準絕對拍得住出面。特別推介Chocolate concorde，外層鋪滿乎古力脆脆，用叉輕輕分成一開二，內裏是一層又一層的蛋糕及mousse，朱古力味極為濃香，加上口感層次豐富，甜迷必試！再歎返杯花茶或咖啡，醒一醒神，再繼續睇書，真係Hea足成日都得。

查詢：2155 9677　　

http://www.thinkers.hk