|
03-
11-
2007
力奇駿馬延續勝勢
|
今日沙田十場泥草賽事，草地用C加三跑道，窄場關係檔位影響較大，外檔馬蝕位較多，最佳當然係排喺中內檔嘅馬。方嘉柏周三憑「世界波」同「好兄弟」起孖後，已經連贏六日，並躍居練馬師龍虎榜首位，氣勢如虹，今日亦強陣應戰，攻勢停不了，延續勝勢非奢望﹗筆者就最鍾意佢旗下嘅「力奇駿馬」同「智勇」。
|
心水場次係第三場三班草地千六米，用「飛躍龍門」做膽拖「必索威」、「東方遊戲」同「拔尖兒」。
「飛躍龍門」雖然年屆七歲，但老馬有火，非同小可，上場跑田草千六米面對一班質新分子，亦能以短馬頭位壓倒「好兄弟」重開勝門，「好兄弟」剛戰谷草贏馬，足以證明「飛躍龍門」該役水準相當高，既然老馬狀態仲咁弗，今次抽排一檔，跑法可攻可守，有力連捷。
「必索威」同「領爵」、「伯峻寶」等駒同父，上場初出跑同程，由於排十一檔起步，出閘後留得較後，且入直路至二百米處曾受困，但望空後衝刺力甚強，輸五乘多畀頭馬「智勇」，表現唔錯，今場抽排二檔，力足威脅前駒，配腳首選。蔡廐今場亦布下強陣，派出三駒上陣，當中「東方遊戲」同「拔尖兒」都具一定爭拚能力，前駒配柏寶，論狀態仍得以保持，此程合發揮，有機會跑入前列，而「拔尖兒」連勝兩仗後上回雖然落敗，但只負個多馬位，今仗同樣有輕磅之利，有權跑入三甲。
第六場四班草地千六米，支持方廐嘅「力奇駿馬」，此駒上季已經有唔錯嘅表現，獲一冠兩亞，今季踏入四歲，質新當打之餘，上仗於田草千四米初出，僅以半個馬位負於「沙田威威」及「飛快勇」得第三，千六米應該更好跑，睇番佢上場末段嘅衝刺力，今場抽排三檔可守到好位，末段便可憑其凌厲後勁贏馬。配腳有「好日子」、「神箭金剛」同「智勇非凡」。
諾嘉：諾在其中
2004 Sing Pao Newspaper Co. Ltd. All rights reserved. 成報報刊有限公司 版權所有 不得轉載
|
即日相關新聞