|
02-
11-
2007
諾在其中﹕冠威星檔佳開勝門
前日萬聖節，馬會專登安排咗好多嘩鬼喺馬場內行嚟行去，搞到現場氣氛不知幾熱鬧，仲有唔少馬迷扮鬼扮馬玩埋一份，幾咁開心。可惜，喺賽事的進行中有兩匹馬「電訊馬主」同「太陽帝國」跛腳，筆者睇馬最怕就係見到呢啲鏡頭，陣上有乜意外，鞍上人真係好危險﹔當然，見到啲馬跑跛腳而要人道毀滅，內心點都唔多好受，希望日後再冇呢類事件啦。
講番聽日賽事，第四場四班千四米，筆者鍾意「冠威星」，呢場對手實力唔係好強，有好多初出馬同只跑過一、兩場嘅質新馬，好似「好知己」、「森淼盛」同「電訊大帝」等，但表面睇呢幾隻馬狀態仍未夠弗。
今次賽事採用Ｃ加三欄，內檔馬會較着數，反而外檔馬就較為蝕底﹔「冠威星」今次有運抽到有利一檔，預計可以賺盡跑道形勢，呢匹馬今季表現其實已較上季進步穩定得多，上仗跑同程田草千四米，排十二檔起步，全程走大外叠，但最終仍只輸畀頭馬「有景」兩個幾馬位，反映戰鬥力唔差。熱身兩場後，「冠威星」狀態更弗，今場對手大幅減弱，應該係時候開齋贏馬，況且杜利萊開咗齋之後，搏殺手風逐漸轉順，發揮肯定冇問題，如有分頭更加值得捧場。
馮諾嘉
2004 Sing Pao Newspaper Co. Ltd. All rights reserved. 成報報刊有限公司 版權所有 不得轉載
|
即日相關新聞