|
29-
08-
2007
昇旺季初具把握
今日繼續講吓沈集成馬房，睇番個最新分廐表，原來經歷上季成績倒退之後，阿成真係有唔少馬被拉走，咪話何許仁口臭，如果佢季初唔爭氣嘅話，恐防呢個拉倉潮仲有餘波，不過，阿成其實都係識計數嘅人，一定知道要點做，兼且佢嘅馬一向跑新鮮都有一手，只要大家睇番歷年九月同十月嘅成績都有番咁上下，就算上季全年埋單贏少咗咁多場頭馬，都叫做捧完特首盃再贏埋國慶盃，按理今季練嗰個為勢所逼，應該點都交到功課，穩住軍心。
正如噚日提過，阿成好多舊馬因為上季冇表現，評分已經減咗唔少，如果本身擅跑新鮮嘅話，應該好大機會成為馬房先頭部隊，好似今季減到落30分起步嘅「財昇旺」，前季仲喺霍利時馬房初出跑谷草千二先拔頭籌，跟住足足兩季未入過三甲，兼且每年跑到季中打後就愈跑愈差，好明顯係一隻唔襟跑嘅馬，趁季初體力足夠，搏命最有把握。
睇番上季「財昇旺」初出跑四班谷草千二，都係輸個零馬位，當時評46分，同依家只評30分足足有成16分差距，全賴隻馬上季中一路操唔起狀態，但係阿成仍然心急同馬主交代，喺咁密密出賽所致，所以跑嚟跑去都係得個近字。
再者，阿成上季大部分時間將隻「財昇旺」集中跑沙田千四，睇嚟未必啱隻馬發揮，始終呢隻馬都係得嗰二百零米衝剌力，都係儲起啖火縮番跑快活谷千二最有揸拿。呢排隻馬安排畀冼文諾摸住，除咗個身仲肥啲之外，已經有番啲神氣，如果之後操練加強嘅話，初出已可起筷。
2004 Sing Pao Newspaper Co. Ltd. All rights reserved. 成報報刊有限公司 版權所有 不得轉載
|
即日相關新聞